«Türkmenistan — ruhubelentligiň we sagdynlygyň ýurdy» atly XIV spartakiadanyň çägindäki ýaryşlaryň Gökdepe etrap tapgyrlary guramaçylykly geçirilýär. Etrapdaky 10-njy orta mekdebiň sport zalynda agzalan spartakiadanyň çäginde woleýbol boýunça geçen ýaryşyň etrap tapgyry hem şeýle diýmäge esas berýär.
Okuwçy ýaşlary sporta giňden çekmek, olaryň berk bedenli, sagdyn ruhly bolup ýetişmegini gazanmak, sport ussatlygyny ýokarlandyrmak maksady bilen geçirilen ýaryşyň nobatdaky tapgyryny «Türkmenistan» Ýaşlar bedenterbiýe-sport guramasynyň welaýat bölümi, etrap bilim bölümi hem-de jemgyýetçilik guramalary bilelikde gurady. Onda etrapdaky umumybilim berýän mekdepleriň okuwçy oglanlary özara güýç synanyşdylar. Çekeleşikli geçen ýaryşda etrapdaky 10-njy orta mekdebiň topary üstün çykdy. 19-njy orta mekdebiň okuwçy oglanlary ikinji, 31-nji orta mekdebiň okuwçylary üçünji orny eýeledi.
