Pyragynyň şygyrlary — edep-terbiýe mekdebi
Watany jany-teni bilen söýen akyldar şahyrymyz Magtymguly Pyragy şol söýgini kalbynyň çuňundan syzdyryp, setirlere siňdirip, halkyna şygyr arkaly serpaý edipdir. Çeper söze maýyl, şahyrana setirlere teşne halkymyz Magtymguly Pyragynyň döredijiligini yhlas bilen öwrenýär, söýüp okaýar, wagyz edýär. Häzirki wagtda şahyryň edep-terbiýä ýugrulan dürdäne şygyrlary watansöýüjiligiň, agzybirligiň, ynsanperwerligiň aýdymy bolup ýaňlanýar. Türkmen ýaşlarynyň bilimli, giň dünýägaraýyşly, sagdyn ruhly, zähmetsöýer, watansöýüji, arassa ahlakly bolup ýetişmeklerinde şahyryň öwüt-nesihata ýugrulan şygyrlarynyň ähmiýeti örän uludyr. Magtymguly atamyz goşgularynda berkarar döwlet, Watany söýmek, agzybirlik, ata-enä hormat goýmak, ulyny sylamak, kiçini sarpalamak, mätäje kömek-goldaw bermek, edepli-ekramly bolmak ýaly meselelere yzygiderli ýüzlenipdir. Bu gün beýik Pyragynyň edep-terbiýe baradaky döredijiligi türkmen ýaşlary üçin ýol-ýörelge bolup hyzmat edýär. Asyrlaryň aýdymyna öwrülip, nesilleriň arabaglanyşygyny üpjün edýän şygyrlar umumadamzat gymmatlyklary hökmünde dabaralanýar.
