Ýagşy saz we ýagşylyk
Nämüçindir, nusgawy sazlar bilen ynsan ýagşylyklaryny bir ýerde goýasym gelýär. Sebäp olary biri-birinden üzňelikde göz öňüne getirip bilemok. Owadan sazyň owadan ýüregiň we kämil paýhasyň nikasynyň miwesidigini hemme bilýär. Friderik Şopeniň etýudlary, polenzleri, prelýudiýadyr noktýurnleri, skersodyr walslary, Lýudwig wan Bethoweniň simfoniýalarydyr sonatalary, Amadeý Mosartyň operalarydyr konsertleri, Pýotr Çaýkowskiniň simfoniýlary hem-de baletleri, Sergeý Rahmaninowyň saz kartinalarydyr romanslary, Mihail Glinkanyň wals-fantaziýalarydyr romanslary, Iogann Ştrausyň walslary, türkmeniň Nury Halmämmediniň fortepiano eserleridir kinofilmlere döreden sazlary... ýenemi? Ýene-de läheňleriň hataryny ep-esli aralyga uzaltsaň, uzaldybermeli welin, geliň, okyjylary surnukdyrmalyň-da, esasy gürrüňe geçeliň. Ýokarda sanawy getirilen dürli žanrlardaky eserler dünyä saz genji-hazynasynyň iň gymmatly, iň gözel, iň süýji, iň eziz mukamlary saýylýar. Kämilligiň nusgalary olar.