Ökde küştçüler ýüze çykaryldy
Dänew etrabyndaky 1-nji sport mekdebinde 8, 10, 12, 14 we 16 ýaşa çenli oglanlaryň arasynda küşt boýunça etrabyň açyk birinjiligi geçirildi. Oňa ýaş türgenleriň 150-ä golaýy gatnaşdy. Olar bu sportuň üç — adaty, rapid we blis görnüşleri boýunça öz aralarynda güýç synanyşdylar. Ilki bilen küştçüler öz ýaş derejelerinde adaty görnüş boýunça bäsleşdiler. Onuň netijeleri boýunça 8 ýaşa çenli oglanlaryň we gyzlaryň arasynda Alihan Seýitjanow we Mähriban Begendikowa dagy hemmelerden öňe saýlandy. 10 ýaşa çenli küştçüleriň arasynda Döwran Merdanow bilen Melike Altybaýewa dagy birinji orny eýelediler. 12 ýaşa çenli küştçüleriň arasynda Baýhan Jumaýewe we Aýnur Hemraýewa taý gelen tapylmady. 14 ýaşa çenli türgenleriň gatnaşmaklarynda geçirilen duşuşyklarda Alijan Ahmedow we Merjen Ibragimowa dagy ähli garşydaşlaryndan köp utuk gazandy. 16 ýaşa çenli oglanlaryň we gyzlaryň arasynda Aýbek Sünnetullaýew we Mähri Aýmakowa birinjiligi hiç kime bermediler. Rapid we blis görnüşleri boýunça ýaryşlar garyşyk görnüşinde geçirilip, oňa ähli ýaşdaky oglanlar we gyzlar gatnaşdylar. Olaryň netijeleri boýunça Mähri Aýmakowa hemmelerden köp utuk toplady we Dänew etrabynyň çempiony diýen ada mynasyp boldy.