AK PILÄNIŇ ULY HARMANY
Pile kabul ediş bölüminiň gapysyndan giren badyňa, ilki bilen, bu ýerde adamlaryň adatdakydan has köpdügi ünsüňi özüne çekýär. Olaryň aglabasynyň şu möwsümde ýüpek gurçugyny idedip, öndüren pile hasylyny getiren ýüpekçilerdigini ýüz-gözlerinden, özara gürrüňlerinden hem aňyp bolýar. Ynha, bir tarapda olaryň birnäçesi ak pileden doly agaç gaplary yzly-yzyna terezä goýup durlar. Hol aňyrda pile arassalaýan enjamlaryň hereketi gözüňe ilýär. Beýle tarapdaky bassyrmanyň aşagyndaky pile hatarlaryny aralap, haýsydyr bir iş bilen meşgul bolup ýörenler hem bar. Şu pursatda nobatdaky gap tereziniň üstüne ýüklenilýär. Tereziban ýigit ony ölçeýär hem-de ýüpekçi ýaşula ýüzlenip, şeýle diýýär:
