Türkmenistanyň Ministrler Kabinetiniň 12-nji martda sanly ulgam arkaly geçirilen mejlisinde ýurdumyzda ýüpekçilik pudagyny ösdürmek boýunça öňde goýlan wezipeleri üstünlikli durmuşa geçirmek, şeýle hem piläniň öndürilýän möçberini artdyrmak we hilini ýokarlandyrmak maksady bilen, hormatly Prezidentimiz degişli Karara gol çekdi. Resminama laýyklykda, Türkmenistanyň Oba hojalyk we daşky gurşawy goramak ministrligine, welaýatlaryň häkimliklerine 2021-nji ýylda jemi 2100 tonna, şol sanda Ahal welaýatynda 155 tonna, Balkan welaýatynda 25 tonna, Daşoguz welaýatynda 500 tonna, Lebap welaýatynda 1010 tonna, Mary welaýatynda 410 tonna çig pile öndürmek tabşyryldy. Şondan ugur alnyp, Mary welaýatynyň Tagtabazar etrabynda hem tejribeli ýüpekçilere we isleg bildirýänlere degişli möçberde ýüpek gurçugy idetmäge paýlanyp berildi.
Ýüpek gurçuklaryna talabalaýyk ideg edip, bol pile hasylyny taýýarlamakda Tagtabazar etrabynyň ýüpekçileri baý tejribe topladylar. Olar ýylyň-ýylyna ak gunduz ýaly ýokary hilli piläniň bereketli hasylyny taýýarlamagyň hötdesinden gelýärler. Dokma senagaty üçin gymmatly çig mal bolan pile öndürmegiň gundagdaky çaga sereden ýaly hysyrdyly işdigine dogry düşünýän etrabyň ýüpekçileri ýüpek gurçuklaryna yhlasly ideg edýärler. Bu babatda degişli hünärmenler gurçuk idedilýän jaýlary gözden geçirip, arassaçylygyň berjaý edilişine, jaýlaryň ýylylyk, çyglylyk derejesine yzygiderli gözegçilik edip, gymmatly maslahatlaryny berýärler. Hünärmenleriň degerli maslahatlarydyr goldawlaryndan netijeli peýdalanýan ýüpekçiler ýüpek gurçuklaryny aýny wagtynda iýmitlendirip, gurçuk tutulýan jaýlaryň çyglylykdyr ýylylyk derejelerini bellenilen şertlerde hem-de düzgüne laýyk arassa saklaýarlar. Ýüpek gurçugynyň esasy iýmiti bolan tut ýapraklarynyň ýeterlik bolmagyny gazanýarlar. Bu bolsa ýüpekçilere garaşýan hasylyny almaga mümkinçilik berýär. «Türkmenistan — parahatçylygyň we ynanyşmagyň Watany» ýylynda etrabyň ýüpekçilerine 1 müň 729 guty gurçuk tohumy paýlanyldy. Olar ýüpek gurçugyna ýokary derejede ideg etmek bilen, mukaddes Garaşsyzlygymyzyň şanly 30 ýyllyk baýramynyň bellenilýän ýylynda 68 tonna ýokary hilli pile hasylyny öndürmegi maksat edinýärler. Ýüpekçiler taýýarlan pile hasyllaryny harmana tabşyrmak bilen bir wagtda, heniz pile saraýan gurçuklara ideg etmek işlerini-de utgaşykly alyp barýarlar.
