Halkara Bitaraplyk güni mynasybetli Türkmenabat şäherindäki «Diýar» toý mekanynda aýdym-sazly baýramçylyk çäresini geçirdik. Türkmenabadyň Agrosenagat orta hünär okuw mekdebi bilen bilelikde guran dabaramyzda talyplar Watanymyzyň özgertmelerini belentden wasp etdiler.
Çäräniň dowamynda ildeşlerimiz hemişelik Bitaraplygymyz mynasybetli ýürek buýsançlary bilen çykyş etdiler. Çykyşlarda ýurdumyzyň durnukly ösüşi, halkara işjeňligi, dünýä jemgyýetçiliginde eýeleýän mynasyp orny dogrusynda nygtaldy. Agzybir halkymyzyň asylly maksatlara eýerýän ösüşleriniň, däp-dessurlarynyň, ýol-ýörelgeleriniň gönezliginde hemişelik Bitaraplygymyzyň durýandygy aýdyldy. Joşgunly aýdymlardyr tanslar ildeşlerimiziň baýramçylyk şatlygyny has-da artdyrdy. Çärä gatnaşyjylar hemişelik Bitarap döwletimiziň halkara derejesinde abraý-mertebesiniň belende galmagy ugrunda belent maksatly işleri durmuşa geçirýän Gahryman Arkadagymyzyň we Arkadagly Gahryman Serdarymyzyň janlarynyň sag, ömürleriniň uzak bolmagyny arzuw etdiler.
